ERAIKINAK ETA BASERRIAREN

BUELTAKO ELEMENTUAK

Baserria zaharberritzean, baserria edo eraikin laguntzaile berriak eraikitzean (ukuiluak, biltegiak, garajea, eta abar), ohizko itxura eta egungo erosotasuna konbinatzea da erronka.

 Baserria zaharberritzearekin batera, handitu nahi bada, baserriaren ezaugarri nagusiak errespetatu behar dira, hala nola, fatxada nagusiaren simetria. Teilatuari dagokionez, zuraje nagusia mantenduko da, nahi bada lataren gainean isolamendua jarriz. Teilatu hegala pixka bat luza daiteke, kapirioen kanpoko muturrak landu gabe mantenduz. Egokia da egungo teilak erabiltzea, banan-banan iltzez eransten diren zeramikazko horietakoak. Kanpoko paretek eskualdeko ohituren araberako akaberak izango dituzte. Leiho berriak irekitzekotan, existitzen direnen tamaina berekoak izan daitezela, batez ere elkarren ondoan badaude, eta fatxadako simetria mantenduz. Pertsianak erabiltzea ez da egokia, horien ordez, barruko leihatilak mantenduko dira, edo kontraleihoak jar daitezke. Barruko banaketak, baserrietako ohizko korridore eta gelen tamaina zabalak errespetatuko ditu. Zurezko egitura duten eraikinek, gaizki onartzen dituzte sukalde eta komunek behar dituzten tutuak. Beraz, komun eta sukaldeak fatxaden kontra jartzea komeni da, tutuak horman behera joan daitezen.

Baserri berria edo eraikin laguntzaileak eraikitzean, landa-arkitekturaren ezaugarri nagusiak mantenduko dira: bolumen garbia (teilatutxorik eta galeriarik gabe), tamaina handi samarra (hobe 3 oin baditu), eta arraseko sarrera maldan dauden lurretan (harri lubetarik gabe). Eraikin laguntzaileak baserritik bereizturik egongo dira, eta beren bolumen eta teilatuek baserria nagusitzen deneko hierarkia islatuko dute. Eranskinak ez dira ukuilu moduan onargarriak, eta baserriaren izaeraren aurka doaz, bere bolumen garbia, simetria eta zurruntasuna hausten dutelako. Baserriaren bueltak bere nortasun eta duintasuna islatu behar du. Lokatzik sor ez dadin, zoladuran material desberdinak konbinatzea komeni da: ibilgailuek zapaldu behar duten horretan hormigoi fina edo asfaltoa, adokinak edo harri txikiak ibilgailurik izango ez den atari eta ezkaratzetan, eta abar. Lan hauek aukera ona eskaintzen dute ustialekuko hondakinak pilatzeko egitura apropos bat sortzeko. Landare apaingarrientzat, zuhaitz bakanentzat, igokarientzat, loredun zuhaixkentzat, eta potoentzat tokia ere egon behar du baserriaren bueltan, atarian, leihoetan eta balkoietan. Baserriaren bueltan lanak egitean, kontua izango da bertan dauden zuhaitzak ez kaltetzeko.
Laguntzak.